愛情小天使 17-9-2005 21:15
從謝霆鋒、房祖名、再到欣宜
近日有關欣宜既話題真係熱爆
不過我反而諗起另外兩位藝人第二代謝霆鋒同房祖名
但係點解我地對佢兩個同欣宜既反應會差咁遠?
謝霆鋒既出道應該算係近十年藝人第二代出道既始創者
當年出道時都唔係好多人睇好
唔多唔少同佢老爸謝四哥有關
因為好多人以為佢係靠老豆關係先可以泊大碼頭
但係大家有冇留意佢咁耐以來
有冇真係因為佢老爸而真係拉到關係同多左演出機會?
佢都要靠自己努力捱左幾年
先至令大家接受佢係謝霆鋒，而唔係謝賢個仔
(至於頂包事件純屬個人操守，與演出無關)
房祖名冇錯我覺得佢真係靠成龍大哥先入到娛圈
但對比欣宜我地又比較接受(註: 係比較)
最大原因我覺得係祖名真係做番佢image既野
房祖名以前一直都係迷樣人物
我地對佢所知唔多，所以可以用新人身份接受佢
而且祖名冇做一d大動作去挑釁大家神經
佢都係做下一d唱作既野(好唔好聽見人見智)
做番一個正常新人應該做既野
就算係佢兩部片"千機變2"同"早熟"
大家喜歡既可以俾錢入去睇，唔鍾意既唔會有人用槍迫你入去
票房自然會反映佢既受歡迎程度
當然成龍可能o係背後做左唔少野
不過佢最聰明既地方係佢做又唔係做出面
所以就算做左都唔太惹人反感
我已經唔去討論欣宜身型合唔合適做白雪公主；
欣宜o係沈澱霞既穿針引線之下經常曝光
由佢出世之後差唔多隔一段時間都會o係公仔箱見到佢
我未見過一個年輕一輩既藝人(?)可以keep住二十年都超高人氣
我覺得出現反欣宜既原因佢兩母女破壞左娛圈生態有關
娛圈好多當紅明星當年都係由低做起
張學友由十八區歌唱比賽出身
霉左幾年之後先開始拍一d低成本電影(第一套好似叫猛鬼差館)
阿王郭富城由泠氣技工到dancer再到藝人都係慢慢捱出來
劉華當年都要做人肉佈景板
甚至近年吳卓羲、林峰、bosco都係由行行企企既角色開始
欣宜既出現完全破壞左呢個由低做起、汰弱留強既系統
我唔知沈澱霞(俾面先會叫佢聲肥姐)係咪真係從中作梗
但係一個由加拿大番來放假既女仔
可以一開始就擔正拍MV，電視台大show既女主角
甚至連全港期待迪記開幕禮中既焦點白雪公主都有佢份?
而且差唔多有沈澱霞既地方，就一定有欣宜出現
點解佢兩母女一出現就一定要成為焦點?
如果無記真係因為沈澱霞既壓力而俾欣宜出鏡
我認為呢一個係香港電視史上既一個大可悲
相信作為一個大台而且下面有大量女藝人同合約女歌手
當中一定可以搵到一個接近大家心目中snow white形象既演員
但係點解欣宜可以跳過一切基本功
打佔就可以得到"本來應該"萬千寵愛既公主角色?
咁樣對其他女藝人係公平?
唔通藝人第二代真係可以有特權?
但係點解石修、黃偉、鄧英敏、李影唔可以庇蔭自己子女?
香港無線電視有限公司似乎已經變成沈澱霞一人之下
當然觀眾可以選擇唔睇一切有欣宜演出既節目
但係觀眾應唔應該因為一個人既選角問題而放棄自由收睇節目既權力?
----------------------------------------------------------------------------------------------
想起有三樣野可以形容佢地三對父子、母女既關係
謝老四係謝霆鋒既負資產；
成龍大哥係房祖名既入場票；
沈殿霞係欣宜既信用卡
謝霆鋒出道時一直被老爸"盛名"所累
就算自己點努力永遠唔會得到認同
而且謝四哥真正係負債先要佢出道還債
同一個負資產人士俾層樓綁死冇分別
謝霆鋒之後捱出來既成績完全同謝賢無關
我好少見到成龍父子同台演出
成龍既做法好似一張門票左佢入行之後
就等佢自己靠本事打天下
呢度不得不讚林鳳嬌家教好
當年毅然放棄一切跟左成龍
廿年來只係相父教子，完全絕跡娛圈
我諗如果唔係咁今日個仔都唔會有咁好既image
至少我地睇唔到房祖名煲煙，或者當街當巷攬住個女仔
背後祖名有冇做過我唔知
但至少有家教既祖名冇o係幕前show俾我地睇
欣宜出世後沈殿霞就離婚
變左自小就冇左老豆(鄭少秋呢個責任推唔甩)
而沈殿霞又一直活躍於娛圈
移民之後更加係香港加拿大兩邊飛
沈殿霞究竟有幾多時間真係停低陪個女番學放學?
欣宜既成長過程好似缺少左父母一環
而沈殿霞可能為左討好個女
一直以物質去滿足佢，例如俾佢食鮑魚當小食
而沈殿霞o係欣宜既心目中
可能已經變左做一張信用卡
想得到咩只要碌一碌卡就可以得到
細個可能只係想食鮑魚龍蝦做早餐
大個左就想得到更多
好似要成為香港版britney spears
要纖體阿媽即刻搵到人幫佢仲有得代言
不過就算係一張簽帳額勁高既信用卡
都總有一日要交卡數
無止境咁碌卡只會高築債台
觀眾既反應好似銀行咁提醒你張卡就爆
如果佢兩母女唔理銀行信既話
唔使好快就會碌爆卡
我覺得講得好岩 ~夠客觀, 同埋係有事實根據
唔知大家點睇~~